ವಿನೋದ್: ಮಾಟ್ಟಿ ಆನಿ ಡೊಟ್ಟಿ ಆಂಟಿಚಿ ಜಟಾಪಟಿ!
ಮಾಟ್ಟಿ ಆನಿ ಡೊಟ್ಟಿ ಆಂಟಿಚಿ ಜಟಾಪಟಿ!
- ವಲ್ಲಿ ವಗ್ಗ
ತಿಸ್ರಿ ಫಾಲಿ ಕಾಮ್ ತಿರ್ಸುನ್, ಸಕಾಳಿಂಚಾ ಸಾತ್ ವರಾರ್, ಬಾಸ್ಸಾರ್ ಥಾವ್ನ್ ಹಾಂವ್ ಮಜ್ಯಾ ಫ್ಲೆಟಾಲಾಗಿಂ ದೆಂವ್ಲಾಮಾತ್ರ್.
ಮಾಕಾ ದೆಕೊನ್, ಸೆಜಾರ್ಚೆಂ ಏಕ್ಲೆಂ ಚೆಡುಂ ಮಜೆ ಸರ್ಸಿಂ ಧಾಂವೊನ್ ಆಯ್ಲೆಂ.
“ಮಾಟ್ಟಿ ಆನಿ ಡೊಟ್ಟಿ ಆಂಟಿ, ಝಗ್ಡೊನ್ ಪಡ್ತಾತ್ ಅಂಕಲ್, ವೆಗ್ಗಿಂ ಯೆ!” ತಾಣೆಂ ಖರ್ಸೆವ್ನ್ ಸಾಂಗ್ತಾನಾ, ಹಾಂವ್ ಥಟಾಕ್ಕ್ ಜಾಲೊಂ.
“ಕಿತೆಂ ಉಲಯ್ತಾಯ್‍ಗೋ? ಖಂಯ್ಚಿ ಮಾಟ್ಟಿ ಆನಿ ಡೊಟ್ಟಿ ಆಂಟಿಗೋ?”
“ತುಜಿ ಮಾಟ್ಟಿ ಆಂಟಿ ಅಂಕಲ್ ಆನಿ ಜೆರಿ ಅಂಕಲಾಚಿ ಡೊಟ್ಟಿ ಆಂಟಿ” ತಾಣೆಂ ಲಟ್ಟ್ ಕರುನ್ ಜಾಪ್ ದಿಲಿ.
“ಅರೇ ಮ್ಹಜ್ಯಾ ಗ್ರಹಚಾರನೊ” ಉದ್ಗಾರ್ಲೊಂ ಹಾಂವ್.
ಮ್ಹಜೆಂ ಮಾಣಿಕ್ ಮಾಟ್ಟಿ, ಆನಿ ಮಜ್ಯಾ ಜಿವಾಚ್ಯೆ ಗಾಂಟಿ ತಸಲ್ಯಾ ಮಿತ್ರಾಕ್, ದೆವಾನ್‍ಂಚ್ಚ್ ಹಾತ್ ಉಕ್ಲುನ್ ಕಾಣಿಕ್ ದಿಲ್ಲೆಂ ತಸಲೆಂ ಡೊಟ್ಟಿ. ಆಜ್ ಝಗ್ಡೊನ್ ಪಡ್ತಾತ್?
ನಾ ಜಾಲ್ಯಾರ್, ದೋನ್ ವರ್ಸಾಂ ಥಾವ್ನ್, ಏಕ್ ಜೀವ್, ಏಕ್ಚ್ ಉಸ್ವಾಸ್ ಮ್ಹಳ್ಳೆಬರಿ ಜಿಯೆಂವ್ಚಿಂ ‘ದೋನ್ ಪಾಕ್ಳ್ಯೊ ಏಕ್ ಫುಲಾ’ ತಸಲಿಂ, ಮಾಟ್ಟಿ ಆನಿ ಡೊಟ್ಟಿ. ಸತ್‍ಚ್ಚ್ ಜಾವ್ನ್, ಲಡಾಯ್ ಕರುಂಕ್ ಪಾವ್ಲಿಂ ತರ್...? ರಾತಿಕ್ ಸುರ್ಯೊ ಉದೆಂವ್ಕ್‍ಯೀ ಭಿಂಯೆಂವ್ಚೊನಾ.
ಹಿ ಗಜಾಲ್ ಹಾಂವ್ ಪಾತ್ಯೆಲೊ ನಾ. ತರೀ, ವೆವೆಗ್ಗಿಂ ಹಾಂವ್ ಮೆಟಾಂ ಕಾಡುನ್, ಮಜ್ಯಾ ಪ್ಲೆಟಾಕಡೆ ಪಾವ್ಲೊಂ. ಆಮ್ಚಾ ಘರಾಕಡೆ ಅಧ್ಯಕ್ಷಾಚೆ ಧುವೆಚ್ಯಾ ಬರ್ತ್‍ಡೇಕ್ ಲೋಕ್ ಜಮ್‍ಲ್ಲ್ಯಾಪರಿಂ ಚಿಕಾರ್ ಲೋಕ್ ಭರ್‍ಲ್ಲೊ ದೆಖೊನ್, ಭುಂಯ್ಕಾಪ್ ಜಾಂವ್ಚೆ ಬರಿ ಮ್ಹಜೆ ಥಂಯ್ ‘ಕಾಳಿಜ್ ಕಾಂಪ್’ ಪ್ರಾರಂಭ್ ಜಾಲಿ.
ಪುಂಕ್ಯಾಚಿ ಲಡಾಯ್ ದೆಖ್ಚ್ಯಾ ಥೊಡ್ಯಾ ಸೆಜಾರ್ಯಾಂಕ್ ಪಯ್ಸ್ ಲೊಟುನ್, ಹಾಂವ್ ಮುಕಾರ್ ಗೆಲೊಂ.
“ಆನ್ನಾಡ್ಯೆ ಬಾಯ್ಲೆ. ದೂದ್ ವೊತ್‍ಲ್ಲ್ಯಾ ಮ್ಹಜ್ಯಾ ಹಾತಾಕ್ ಖೊಂಚ್ ಮಾರ್ಲಿಯ್ ತುಂವೆಂ!”
ನವ್ಯೊಚ್ಚ್ ಬೆಟ್ರ್ಯೊ ಘಾಲ್ಲ್ಯಾ ಕಾರಾಚಾ ಹೊರ್ನಾಪರಿಂ, ಡೊಟ್ಟಿಚೊ ತಾಳೊ ಮಜ್ಯಾ ಕಾನಾಂಚಾ ಫುಲಾಂಕ್ ಯೇವ್ನ್ ಆಪ್ಟಾಲೊ.
“ತುಜೊ ನೆಕ್ಲೆಸ್ ಮಾರ್ವಾಡ್ಯಾಕ್ ಅಡವ್ ದವ್ರುನ್, ‘ಹಾಂವೆಂ ಚೊರ್ಲಾ’ ಮ್ಹಣ್ ಗಾಜಾಯ್ತಾಗೀ ಭಾಣ್ಶಿರ್ಯಾ?”
ಲೊಕಾ ಮದೆಂ ಮ್ಹಜಿ ತಕ್ಲಿ ಝಳ್ಕಾಲ್ಲಿಚ್ಚ್, ಮ್ಹಜೆಂ ಮಾಟ್ಟಿ-ಕಟ್ಟಿ ಜಾಲೆಂ!
“ಕಿತೆಂ ಮ್ಹಣ್ ಚಿಂತ್ಲೆಂಯ್ ತುಂವೆಂ?” ತಾಣೆಂ ಡೊಟ್ಟಿಚಾ ಶೆಂಡ್ಯಾಕ್ ಧರ್ಲೆಂಚ್ಚ್!
ತಿತ್ಲ್ಯಾ ಭಿತರ್ ಹಾಂವ್ ತಾಂಚೆ ಸರ್ಸಿಂ ಪಾವ್‍ಲ್ಲ್ಯಾನ್ ಬಚಾವ್!
ನಾ ತರ್ ಮಜ್ಯಾ ಆನಿ ಜೆರಿಚೆ ಏವೆಚಿ ಪುಂಕ್ಯಾಚಿ ಕುಸ್ತಿ ಸೆಜಾರಿ ಲೋಕ್ ಸಂತೊಸಾನ್ ದೆಖ್ತೊ.
ಕಿತ್ಯಾಕ್...?
ಡೊಟ್ಟಿ ಆನಿ ಮಾಟ್ಟಿ ಎಕಾ ಆವಯ್ಚಾ ಉದರಾ ಥಾವ್ನ್, ಜನ್ಮೊಂಕ್ ನಾತ್‍ಲ್ಲಿಂ ತರೀ, ಭಯ್ಣ್ಯಾಂಚ್ಯಾಕೀ ಚಡ್ ಮೊಗಾನ್ ಜಿಯೆತಾಲಿಂ.
ತಾಚೆಂ ಕಾಪಾಡ್ ಹೆಂ ನ್ಹೆಸ್ತಾಲೆಂ!
ಹಾಚ್ಯೊ ವ್ಹಾಣೊ ತೆಂ ಶಿರ್ಕಾಯ್ತಾಲೆಂ!
ಬಾಜಾರಾಕ್, ರೆಶಾನಾಕ್, ಸಿನೆಮಾಕ್, ವ ನಾಟಾಕಾಕ್, ತಿಂ ಸಾಂಗಾತಾಚ್ಚ್ ವೆತಾಲಿಂ!
ಇತ್ಲೆಂಚ್ ನಹಿಂ, ಮಾಟ್ಟಿ ಕುಮ್ಗಾರಾಚಾ ಲಾಯ್ನಿಕ್ ಉಬೆಂ ಜಾಲ್ಯಾರ್ ಮಾತ್ರ್, ಡೊಟ್ಟಿಯೀ ಕುಮ್ಗಾರಾಕ್ ವೆತಾಲೆಂ.
ಆತಾಂಚ್ಯಾ ದಿಸಾಂನಿ, ಬಾಪಯ್ ಪುತಾ ಮದೆಂ ಫಯ್ಟಿಂಗ್!
ಘೊವ್ ಬಾಯ್ಲೆ ಮದೆಂ ಬೊಕ್ಸಿಂಗ್!
ಇಶ್ಟಾಂ-ಮಿತ್ರಾಂಮದೆಂ ಆನಿ ಸ್ತ್ರಿಯಾಂ-ಬಾಯ್ಲಾಂಮದೆಂ ಮೊಸ್ರಾಚೆಂ ಅಗ್ಟೆಂ ಜಳೊನ್ ಆಸ್ಚ್ಯಾ ಹ್ಯಾ ಆಧುನಿಕ್ ಕಾಳಾರ್, ಜೆರಿ ತಸೊ ಹಾಂವ್, ಡೊಟ್ಟಿ ತಸೆಂ ಮಾಟ್ಟಿ ಮೊಗಾ ಮಾಯ್ಪಾಸಾನ್ ಜಿಯೆಂವ್ಚೆಂ ದೆಖೊನ್ ಆಮ್ಚ್ಯಾ ಸೆಜಾರ್ಚೊ ಸಗ್ಳೊ ಲೋಕ್ ರಾಗಾ ಆನಿ ಮೊಸ್ರಾನ್ ಮುರ್ಮುರ್ತಾಲೊ.
ಥೊಡ್ಯಾ ಬಾಯ್ಲಾಂನಿ ಆಮ್ಚಾ ಘರ್ಕಾರ್ನಿಂನಿ ಝಗ್ಡೊನ್ ಪಡಾಜಾಯ್ ಮ್ಹಣ್, ಏಕ್ ವಾತ್ ಜಳಾವ್ನ್, ಆನ್ಯೆಕ್ ಫುಲಾಂಚೊ, ಹಾರ್ ಖಂಯ್ಚಾಯೀ ಸಾಂತಾಚಾ ಗಳ್ಯಾಕ್ ಘಾಲ್ಲೊ ಕೊಣ್ಣಾ!
ನಾ ಜಾಲ್ಯಾರ್, ಅಶೆಂ ಘಡೊಂಕ್ ಸಾಧ್ಯ್ ಆಸಾಗೀ?
“ಕಸಲಿ ಅವಸ್ಥಾ ಮಾಟ್ಟಿ ಹಿ?” ಡೊಟ್ಟಿಚಾ ಶೆಂಡ್ಯಾಕ್ ಧರ್‍ಲ್ಲ್ಯಾ ಮಾಟ್ಟಿಚಾ ಬಾವ್ಳ್ಯಾಕ್ ದರುನ್ ಹಾಂವೆಂ ಪಾಟಿಂ ವ್ಹೊಡ್ಲೆಂ.
ಇತ್ಲ್ಯಾರ್ ಹಾತ್ ಉಕ್ಲುನ್ ಮ್ಹಜ್ಯಾ ಎಕ್ಲ್ಯಾಚ್ಚ್ ಮೊಗಾಚ್ಯೆ ಬಾಯ್ಲೆಕ್ ಥಾಪ್ಡುಂಕ್, ಡೊಟ್ಟಿನ್ ಮುಕಾರ್ ಯೆಜಾಯೆಗಿ?
ತ್ಯಾ ವೆಳಾ ಮ್ಹಜೊ ರಾಗ್ ಮಸ್ತಕಾಕ್ ಚಡೊನ್ ಕೆಸಾಂತ್ಲ್ಯಾನ್ ಪಾಜರ್ಲೊ.
“ಹೇಯ್, ಕತ್ತ್ಯಾಂನೊ ತುಮಿ ತುಮ್ಚ್ಯೊ ಘಡಾಮೊಡಿ ರಾವವ್ನ್ ನೀಜ್ ಗಜಾಲ್ ‘ಕಿತೆಂ-ತಿ’? ಮ್ಹಣ್ ಮಾಕಾ ವಿವರ್ಸಿ ನಾ ಜಾಲ್ಯಾರ್, ತುಮ್ಕಾಂ ದೊಗಾಂಯ್ಕೀ ಏಕಾಚ್ಚ್ ಖೊಟೆನ್, ಘಟಾರಾಂತ್ ಪಡಾಶೆಂ ಕರ್ತೊಲೊಂ ಪಳೆಯಾ” ಮ್ಹಜೊ ಖಡಾ ಖಡ್ ತಾಳೊ ಆಯ್ಕೊನ್, ಡೊಟ್ಟಿ ಬೊಬಾಟ್ಲೆಂ.
“ಹಾಣೆ ಘಾತ್ಕ್ಯಾನ್ ಮ್ಹಜೊ ನೆಕ್ಲೆಸ್ ಮಾರ್ಲೊ”
“ಥತ್ತ್ ಫಟ್ಕಿರ್ಯಾ ಕೊಣಾಕ್ ಜಾಯ್ ತುಜೊ ತೀನ್ ಕಾಸಾಂಚೊ ನೆಕ್ಲೆಸ್?” ಮಾಟ್ಟಿ ಮ್ಹಜ್ಯಾ ಹಾತಾಂನಿ ಹುಳ್ವುಳ್ತಾನಾ, ನೀಜ್ ಜಾವ್ನ್ ಹಾಂವ್ ಮ್ಹಜ್ಯಾ ರಾಗಾಕ್ ನಿಯಂತ್ರಣ್ ಕರುಂಕ್ ಸಕ್ಲೊನಾಂ.
ದೊಗಾಂಯ್ ಮಧೆಂ ಗಾಳಿ, ಶಿರಾಪಾಂಚೊ ಪಾವ್ಸ್ ವೊತೊಂಕ್ ಪ್ರಾರಂಭ್ ಜಾತಾನಾ, ಮಾಟ್ಟಿಕ್ ಹಾಂವೆ ಫ್ಲೆಟಾ ಭಿತರ್ ಲೊಟುನ್ ಸೊಡುನ್ ಭಾಯ್ಲ್ಯಾನ್ ಖಿಳ್ ಘಾಲಿ.
ತಸೆಂಚ್ಚ್, ಡೊಟ್ಟಿ ಜೆರಿಚಿ ಅರ್ಧಾಂಗಿಣ್ ತರೀ, ಕ್ರೊಧಾಚ್ಯೆ ಧಾವೆನ್ ಎಕಾಚ್ಚ್ ಹಾತಾನ್ ಆಮ್ಚಾ ಫ್ಲೆಟಾಚಾ ದೆಗೆನ್‍ಂಚ್ ಆಸ್ಚ್ಯಾ ತಾಂಚೆ ವಸ್ತೆ ಭಿತರ್ ತಾಕಾ ಲೊಟುನ್, ಹಾಂವೆಂ ದಾರ್ ಬಂದ್ ಕೆಲೆಂ.
ಉಪ್ರಾಂತ್ ಥಂಯ್ಸ್‍ರ್ ಕುಡ್ಸಾಲ್ಲ್ಯಾ ಲೊಕಾಕ್ ದೆಖೊನ್, ಹಾಂವೆಂ ಘಡ್ಗಡ್ಯಾ ಸಾರ್ಕೊ ತಾಳೊ ಕಾಡ್ಲೊ.
“ಕಸಲೊ ನಾಟಕ್ ಪಳೆಂವ್ಕ್ ತುಮಿ ಹಾಂಗಾ ರಾವ್ಲ್ಯಾತ್? ಉಸಳಾ ಆನಿ ನಿಕಳಾ ಹಾಂಗಾಚಿಂ!”
ದುಸ್ರ್ಯಾ ದಿಸಾ ಸಕಾಳಿಂ ಡೊಟ್ಟಿ ಆನಿ ಮಾಟ್ಟಿ ತಾಂಚೆ ಮದೆಂ ಕಸಲೆಂಚ್ ಅನಾಹುತ್ ಘಡೊಂಕ್ ನಾತ್‍ಲ್ಲೆ ಬರಿ ಬಾಜಾರಾಕ್ ಭಾಯ್ರ್ ಸರ್ಲಿಂ.
ಆದ್ಲ್ಯಾ ದಿಸಾ ತಾಂಚೆ ಮಧೆಂ ಜಾಲ್ಲ್ಯೆ ‘ಪುಂಕ್ಯಾಚ್ಯೆ ಲಡಾಯೆ’ ಚೊ ಘುಟ್ ಸಾಂಜೆರ್ ಕಾಮಾ ಥಾವ್ನ್ ಆಯಿಲ್ಲ್ಯಾ ಜೆರಿಕ್ ಆನಿ ಮ್ಹಾಕಾ ರಾತಿಂ ಕಳ್‍ಲ್ಲೊ ತರೀ, ತಾಚೊ ಮತ್ಲಾಬ್ ಸೆಜಾರ್ಚಾ ಮೊಸ್ರಿ ಲೊಕಾಕ್ ಕಳಜಾಯ್ ಮ್ಹಳ್ಳ್ಯಾ ಉದ್ದೇಶಾನ್, ತಿಂ ತಿಕ್ಕೆ ಪಯ್ಸ್ ಪಾವ್‍ಲ್ಲೆ ತಕ್ಶಣ್, ಹಾಂವೆಂ ಮಾಟ್ಟಿಕ್ ವ್ಹಡ್ಲ್ಯಾನ್ ಅಪವ್ನ್ ಮ್ಹಳೆಂ.
“ಕಾಲ್ ನಹಿಂವೆ ತುಮಿ ಸರ್ಪಾ ಆನಿ ಮುಂಗಾಸಬರಿ ಝಗ್ಡೊನ್ ಪಡ್‍ಲ್ಲ್ಯಾತ್?”
“ಆಮಿ ಝಗ್ಡೊನ್ ಪಡೊಂಕ್ ನಾಂವ್. ಬಗಾರ್ ಆಮ್ಕಾಂ ದೆಖೊನ್ ಮೊಸ್ರಾನ್ ಜಳ್ಚ್ಯಾ ಲೊಕಾಕ್ ಕಾಲ್ ಆಮಿ ಥೊಡೆಂ ಸಮಾಧಾನ್ ಕೆಲೆಂ” ಮ್ಹಣ್ ಮಾಟ್ಟಿನ್ ಮ್ಹಳೆಂ.
ತಿತ್ಲ್ಯಾರ್ ಡೊಟ್ಟಿ ಬೊಬಾಟ್ಲೆಂ “ಆಮ್ಚೊ ಸೆಜಾರ್ಚೊ ಲೋಕ್ ಸಗ್ಳೊ ಕಾಲ್ ಎಪ್ರಿಲಾಚಿ ಪೈಲಿ ತಾರಿಕ್ ಮ್ಹಣ್ ನೆಣಾ ಜಾಲೊ. ತಾಂಕಾಂ ಸಕ್ಡಾಂಕ್, ಮಾಟ್ಟಿ ಆನಿ ಡೊಟ್ಟಿ ಆಂಟಿಚಿ ಕುಸ್ತಿ ದೆಖೊನ್, ಭಾರಿಚ್ ಸಂತೋಸ್ ಜಾಲೊ ಪಾಪ್ ಬಿರ್ಮತ್ ಬಾವ್ಡ್ಯಾಂಚಿ!”
ದೊಗಾಂಯ್ ಎಕಾಚ್ ರಂಗಾಚಿಂ ಕಾಪ್ಡಾಂ ನ್ಹೆಸೊನ್, ಹಾತಾಕ್-ಹಾತ್ ಧರುನ್, ‘ಗುಳ್ಳ್’ ಕರುನ್ ಹಾಸೊನ್, ಜಾಜಾರಾಕ್ ಚಮ್ಕತಾನಾ,
ಡೊಟ್ಟಿ ಆನಿ ಮಾಟ್ಟಿನ್, ಕಿತ್ಲೆಶಾ ಲೊಕಾಕ್ ಸುಲಭಾಯೆನ್ ‘ಎಪ್ರಿಲ್ ಫೂಲ್’ ಕೆಲ್ಲಿ ರೀತ್ ಚಿಂತುನ್, ಮತಿ ಭಿತರ್‍ಚ್ ಹಾಂವ್ ಹಾಸ್ಲೊಂ!